Fortun nainis sa pagsasalita ni Deniece Cornejo

MANILA, Philippines – Muling ipinaliwanag ng high profile lawyer Raymond Fortun kung bakit siya umalis sa kampo ng negosyanteng si Cedric Lee at modelong si Deniece Cornejo.

Sinabi ni Fortun na hindi na niya kinayang gampanan ang kanyang trabaho bilang tagapagsalita ng kampo, isang linggo matapos siyang kunin nina Lee at Cornejo.

"[I have] not [lost faith] in them, I lost faith in my ability to help them," wika ni Fortun sa isang panayam sa telebisyon kagabi.

"Hindi ko na kayang gampanan yung trabaho ko e. The job that was given to me was a spokesman, to educate the public on the rights of the accused, on the right to counsel ... The job na binigay sa'kin was just too much," pag-aamin ng abogado.

Isa sa mga hindi niya nagustuhan ay ang pagsasalita ni Cornejo sa media ukol sa lumabas na kuha ng closed-circuit television camera kung saan nakita sila ni Lee na naglalandian sa elevator.

Aniya hindi na dapat ito ginawa ni Cornejo dahil lalo lamang gugulo ang kaso nila laban sa TV host na si Vhong Navarro.

"The bottomline is, 'pag meron ka nang spokesman, you allow the spokesman to do all the talking for you. Because as any counsel would tell you, less talk, less mistake," komento ni Fortun.

Sinabi ni Fortun na napag-usapan na nila nina Lee at Cornejo na kokonsulta muna sa mga abogado bago maglabas ng pahayag.

"You want really just one source of information that is very weighted," dagdag niya.