MANILA, Philippines - Hinimok ng Philippine Overseas Employment Administration ang mga Balik-Manggagawa (BM) o mga Overseas Filipino Workers (OFWs) na magbabalik na sa kanilang trabaho sa ibayong dagat na gamitin o i-avail ang online appointment system ng POEA para sa pagproseso ng kanilang exit clearance o Overseas Employment Certificate (OEC).
Ang payo ni POEA Administrator Hans Leo J. Cacdac ay kasunod nang inaasahang pangingibang-bansa muli ng mga OFWs na sa Pilipinas nagdiwang ng Holiday Season.
Ayon kay Cacdac, mas mainam gamitin ang online appointment system upang hindi na mahirapan ang mga OFWs sa pag-aasikaso ng kanilang mga kinakailangang dokumento sa pagbabalik-trabaho.
Ang naturang Internet-based facility na binuksan ng POEA noong nakaraang taon ay nagbibigay ng pagkakataon sa mga nagbabakasyong OFWs o BM na magtakda ng appointment para sa pagpu-proseso ng kanilang OEC online o gamit ang internet.
Ayon sa POEA, ang libreng serbisyo ay maaaÂring mai-avail sa site na http://bmappointment.poea.gov.ph/.
Ang naturang site ay may checklist ng requirements (all original) na kinabibilangan ng Passport, na balido ng anim na buwan mula sa petsa ng departure, Valid Work Visa / Work Permit o Equivalent Document, Proof of Employment returning to same employer (e.g., Employment Contract, Certificate of Employment/Company ID/Pay slip).
Mayroon rin listahan ng mga fees na dapat na bayaran tulad ng POEA Processing Fee, P100 per e-Receipt / OEC, OWWA Membership Contribution, 25 USD (in peso equivalent) per contract coverage, PhilHealth contribution, P1,200 one-year coverage, Pag-IBIG contribution, na may P100 minimum amount kada buwan.