Sa pagkakaaresto sa driver ng backhoe kaso ng Maguindanao masaker bibilis

MANILA, Philippines - Naniniwala si PNP Chief Director General Nicanor Bartolome na ang pagkakaaresto sa pangunahing suspek sa 2009 Maguindanao massacre ay magpapabilis ng kaso at hahantong sa pagkakaroon ng hustisya para sa may 58 biktima ng pagpatay.

Si Bong S. Andal, ang umano’y operator ng backhoe na ginamit sa paglibing sa mga biktima ng masaker sa Brgy. Salman, Ampatuan, Maguindanao noong November 23, 2009 ay naaresto nitong Sabado sa kahabaan ng National Highway sa Barangay Kapinpilan, Midsayap, Cotabato ng pinagsanib na operatiba mula sa Cotabato Police Provincial Office sa pamumuno ni S/Supt Roque Alcantara at Pikit Municipal Police Station at Midsayap Municipal Police Station.

Si Andal ay nasa ilalim ng Warrant of Arrest na inisyu ni Hon Jocelyn Solis-Reyes, Presiding Judge ng RTC Branch 221 ng Quezon City.

“The arrest of Andal, and other suspects now in custody manifests the firm resolve of the PNP to arrest and prosecute all suspects behind the mass murder,” sabi ng chief PNP.

Dahil dito, inatasan ni Bartolome ang mga PNP Units na magsagawa ng pagtugis laban sa natitira pang 92 suspek na patuloy na nakakalaya at nagtatago sa kamay ng batas.