Kandidato pagka konsehal niatras kay way financier

CEBU, Philippines — Miatras sa iyang kandidatura pagka konsehal sa Dakbayan sa Talisay ang usa ka ginang nga giingong wala na tubaga sa nipasalig nga maoy mo finance sa iyang pagkandidato.   

Si Josie Bas Lopez nibutyag sa Banat News nga gihaylo siya sa kanhi konsehal nga si Aldin Diaz nga siya modagan pagka konsehal.Matud pa niya nga dili gyud unta siya gusto nga mokandidato tungod kay nasayod siya nga dako og gasto ang magpapili.

Pero pinaagi sa iyang kauban nga nagpapili sab pagka konsehal siya nidayon sa paglangsad kay gipadad-an man sila og kwarta sa giingon nga ilang pinanser.

Asoy pa ni Lopez nga last minute na gyud ang ilang pagduso sa Certificate of Candidacy (COC).

“Nahiubos gyud ko sir kay magmeeting unta mi pero wala ko tungaha. Wala gani ko maka kaon ato. Way klaro tawhana,” nagkanayon si Lopez

Sigon pa ni Lopez nga iyang gitextsan ug gitawagan ang giingon nga pinanser pero wala gyud kini mitubag.

Si Lopez midangop sa buhatan ni Talisay City mayor Gerald Anthony “Samsam” Gullas aron ipahibawo ang iyang pag withdraw sa kandidatura.

Tumong ni Lopez nga mapahibawo ang mayor nga naa ang iyang suporta niini ug igo lang siya nga na scam sa nagpatuo nga pinanser.

Nilahos dayon siya sa buhatan sa Commision on Election (COMELEC) aron kompletohon ang mga dokumento sa pag withdraw sa iyang kandidatura.

Giingon nga ang nagpadagan ni Lopez mao sab ang nagpadagan ni Roger Cimafranca pagka mayor nga una nang mi withdraw sa iyang kandidatura.

Apan si kanhi konsehal Diaz nihimakak sa pasangil ni Lopez ug siya nipasabot nga sa iyang nahibaw-an adunay problema pinansyal si Lopez.

Nagkanayon si Diaz nga si Lopez mismo ang miduol kaniya nga nipadayag sa intensyon nga magpapili ug nihangyo nga magpatabang pinansyal.

“Ako siya nga gisanong kay kaila man sab mi, pero nagkadugay nagsige naman og pangayo,” matud pa ni Diaz.

Asoy pa niya nga maayo pa nga siya nalang ang modagan kaysa magpadagan og tawo nga walay winnability.

Gihimakak sab ni Diaz ang pasangil nga siya ang nagpadagan ni Cimafranca pagka mayor sa Talisay.

Iyang gibutyag nga daan na nga ganahan gyud mahimong opisyal sa gobyerno si Cimafranca tungod sa iyang background nga makapila na magpapili sa mga nanglabay nga piniliay.  (BANAT NEWS)