Hubog namaregla og sakyanan priso
CEBU, Philippines — Nabalhog sa prisohan ang usa ka 21-anyos nga lalaki’ng hubog human kini namuak og windshield sa nagparada nga sakyanan diha sa 159 Sikatuna Street Barangay Zapatera, Siyudad sa Sugbo kagahapon sa kadlawon.
Ang suspetsado mao si alyas “Ian”, residente sa Sampaguita 3, Barangay Lamac, Lungsod sa Consolacion.
Base sa taho sa sa Parian Police Station sa Cebu City Police Office nga ang 42-anyos nga biktima kinsa molupyo sa maong dapit nakadawat og alarm sa cellphone niini.
Ug sa pagsusi sa biktima sa footage sa closed circuit television (CCTV) sa ilang balay nakita ang suspetsado nga nibunal-bunal sa iyahang sakyanan nga nagparada.
Nabuak ang windshield ug suga ug daghang garas ang sakyanan sa biktima.
Giingong gibuak usab sa suspetsado ang jalousie ug drain pipe ug naguba usab ang atubangang pultahan nga nikabat tanan ngadto sa P100,000 ang danyos.
Gidakop ang suspetsado sa mga BPSO sa Barangay Zapatera ug gidala kini diha sa Parian Police Station.
Nasayran nga gikan nitan-aw sa Sinulog ang suspetsado ug nahubog kini.
Ang suspetsado gikatakdang pasakaan og tukmang kaso sa nahimo niining kalapasan. (BANAT NEWS)
- Latest
