Mga karsada sa Cebu City nga sirad-an karon

CEBU, Philippines — Duha ka mga dagkong kompetisyon nga may kalabutan gihapon sa Sinulog 2025 ang mahitabong karong adlawa, usa ka semana sa dili pa ang gipaabot nga engrandeng selebrasyon sa Cebu City.

Ang kompetisyon himoon diha sa Cebu City Sports Center  karong adlawa, Domingo Enero 12, kini mao ang pagtigi sa mga labing maayong brass bands ug ang  Sinulog sa Dakbayan nga gitawag kaniadtong Sinulog sa Kabataan.

Tungod niini, giawhag sa Cebu City Transportation Office (CCTO) ang publiko nga planuhon og maayo ang ilang mga lakaw aron dili matanggong sa mga pangsirad-an nga mga dalan. Alas-9 sa buntag, sirad-an sa trapiko ang M.J. Cuenco Avenue, gikan sa Pope John Paul II Ave. hangtud sa Gorordo Avenue, P. Del Rosario St. ( gikan sa eskina Osmeña Blvd. hangtud sa Sikatuna St.), R. Landon St. padung Junquera Extension, ingon man sa Pelaez ug D. Jakosalem Street.

Samtang partial road closure sab ang himuon sa Osmeña boulevard gikan sa eskina sa P. Del Rosario St. hangtud sa R. Landon St. lakip na ang Imus Avenue, gikan Sikatuna St. hangtud sa Gen. Maxilom Avenue.

Gitambagan ang mga motorista nga mangita daan og alternatibong mga dalan aron dili madelatar.

Sa dili pa sugdan ang Sinulog sa Dakbayan street dancing, dunay himuong Santos nga Misa diha sa Barangay Mabolo nga diin gikatahong nagagikan ang orihinal nga Sinug dance steps.

Gikan sa 12 ka partisipante sa miaging tuig, karon nahimo na kining 18 ka contingents nga magtigi sa Sinulog sa Dakbayan  nga pangunahan sa defending champion, ang Banauan Cultural Group sa Barangay Guadalupe.

Gipaabot nga maninguha ang Banauanons karon tungod kay ilang makabangga ang sikat kaayong Lumad Basakanon ug dili matag-ang Banay San Nicolasnon u gang Inayawan Talents Guild.

Samtang niapil sab ang Hugpong Mananayaw ng Bayan – University of the Philippines,  Asian College of Technology – International Educational Foundation ug ang Abellana National School, Lun-as Cultural Dance Troupe.

Ang ubang mga mosalmot mao ang Barangay Kamagayan Landonian Tribe, Aktibong Binaliwhanon, Barrio Basak Pardo, Barangay Zapatera, Maampoong Baniladnon, Hugpong Day-Asnon, Lambo Mabolo, Hugpong Masidlakon Home of Siomai Festival, Banay Labangon u gang  Bag-Ong Tribu: Kasambagan.

Gawas sa Sinulog sa Dakbayan, masaksihan sab sa labing unang higayon ang brass band competition diha gihapon sa CCSC nga unang magtigi sa dili pa magsugod ang Sinulog sa Dakbayan showdown.

Manukad ang mga magtigi nga brass bands  diha Imus padung sa CCSC.  Si Vice-mayor Donaldo Hontiveros maoy gipaabot nga manguna sa pag-abli sa kompetisyon samtang si Mayor Raymond Garcia mao ang sa Sinulog sa Dakbayan.

Ang magtigi nga mga banda mao ang Alroan Marching Band, Banda Dos Kabataan, RNB Youth Symphonic Band, Luciano, Magdalo Band, Saint Florian Marching Band, Richoy Colina’s Brass Band, City of Lapu-Lapu Marching Band ug ang 560th Air Base Group Marching Band.

Samtang ang Cebu City Marching Band mopasundayag sab isip guest performer. Ang brass band competition maoy gipuli sa Sinulog sa Lalawigan nga wala na karong tuiga. (BANAT NEWS)