Arce naa nagpuyo sa buhatan sa CCTO?
CEBU, Philippines — Gihatagan og katin-awan sa pangulo sa Cebu City Transportation Office nga si Raquel Arce ang nigawas nga isyu nga giingong nagpuyo siya sa buhatan sa CCTO.
Usa ka Facebook user nga naggamit sa pangalan nga “Inday Nalda” ang nipasangil kang Arce nga giingong nagpuyo diha sa maong buhatan.
“Uo naa ra si Raquel gapuyo sa CCTO ug ngadto sad ko gapuyo. Libre tanan. Aircon. Kurente. Tubig. Hayahay ang buhay”, matud sa post.
Matud ni Nalda nga nitubag ra siya pinaagi sa usa ka post sa usa ka personal nga pangutana ug giingong kahibalo tanang personnel sa CCTO nga anaa nadestino sa South Road Properties.
“Wa man na gitago. Ladlad man na. Ang wa kabalo guro kana rang naa sa field nga once in a blue moon ra makaadto’g SRP”, laing tipik sa post.
Ang maong pasangil gihatagan kini og katin-awan ni Arce ug matud niya nga mo-estar siya sa buhatan kon adunay mga dagkong kalihokan sama sa siyam ka adlaw nga Novena Mass, Misa de Gallo ug ilabi na og adunay ipahigayon nga mga overnight nga mga operasyon isip pagpangandam karon nga nagkaduol na ang Sinulog.
“I am a hands on leader especially on large events. I see to it nga naa gyud ko. So, usahay kapoyan nako mo uli. I report beyond the 8 hrs. duty. But dili na permamente”, pasabot ni Arce.
Giklaro usab ni Arce nga aduna usab siya’y balay nga anaa nahimutang sa Barangay Pardo.
Dugang ni Arce nga ang maong pasangil wala kini igong basehan ug nakaila siya sa tawo nga nagpaluyo sa maong post ug aduna kini kahiubos kaniya. — /BDB (BANAT NEWS)
- Latest
