Garcia mosusi sa dagkong quarry companies

CEBU, Philippines — Si Gobernador Gwendolyn Garcia sa Probinsiya sa Sugbo buot mosusi sa tanang dagkong quarry companies nga adunay operasyon sa nagkadaiyang lungsod ug siyudad sa Lalawigan sa Sugbo.

Kini aron masuta kong nituman ba kini sa mga lagda pagpanalipod sa kalikupan, bayranan sa buhis ngadto sa gobiyerno ug nisunod ba sa ubang lagda samtang nagpadayon ang ilang operasyon.

Una nang nasusi ni Garcia ang Apo Land and Quarry Corporation (ALQC) sa Siyudad sa Naga ug niluwat siya og cease and desist order batok sa maong quarry company sa pagpahunong sa pagkubkob sa mga areas o dapit nga ubos sa Mineral Production and Sharing Agreement (MPSA).

Ang ALQC maoy nagsuplay og limestone sa Cemex Philippines.

Gikatakda nga ang Taiheiyo Cement Philippines ang sunod nga ipaubos sa joint inspection diin ang maong kompaniya nagkuha og suplay gikan sa Solid Earth Development Corp., sa Lungsod sa San Fernando.

"Dili ra sila akong gi-target, hasta pod ning Century Peak, ipaiimbestigar ta gyud mong tanan kay I wouldn’t mind if magsira mo or ipasira ta mo, we cannot afford this anymore", ni Garcia pa.

Si Garcia niluwat sa maong pamahayag human niya masayri ang ubay-ubay nga kalapasan sa quarry operators sama sa ALQC diin matud sa gobernador nga gawas nga ilang nakita nga lapad na kaayo ang nakubkob diha sa Siyudad sa Naga ang gikubkoban niabot na sa mga dapit nga adunay nagpuyo nga mga residente.

Dili usab makatuo si Garcia nga sa kalapad nga gikubkob diha sa Naga gamay ra ang volume o gidaghanon sa gikubkob gikan sa MPSAs.

"By the time nga nahitabo tong Naga tragedy, CEMEX was already producing 3.9. million metric tons annually, but if you would look at the report of APO Land, it’s not even one half of that, not even one third of that, gamay ra kaayo ang gi-report nga volume, pero grabe na kaayo ang ilang gi-extract, mao to nga nag-landslide gyud",butyag ni Garcia.

Gisaway usab sa gobernador ang Department of Environment and Natural Resources (DENR)-7, Mines and Geosciences Bureau (MGB), ug ang Environmental Management Bureau (EMB) nga giingong nitugot nga makahimo og lapad nga extraction ang maong kompaniya bisan og niabot na kini sa mga dapit nga duol sa mga nagpuyo.

Ang MGB maoy ahensiya nga moluwat og MPSA o kasabotan nga nagtugot sa usa kontraktor nga magkubkob o mo mina sa usa ka partikular nga lugar.

Samtang ang EMB maoy moluwat sa Environmental Compliance Certificate (ECC).

Si Garcia nagkanayon nga iyaha na kining na diskubrehan dihang nisakay siya og chopper gikan sa south padulong sa norte diin iyang nakita ang lapad nga pagkubkob didto sa south.

Kini ang hinungdan nga iyang gipasusi sa Kapitolyo ang records ug mga dokumento sa operasyon sa maong mga kompaniya ug nasayran nga niabot na sa may komunidad ang pahak gikan sa pagkubkob. — /BDB (BANAT NEWS)