Cebu City mopatuman og liquor ban sa Sinulog

CEBU, Philippines — Wala pa’y kasigurohan kong hingpit nga ma-enjoy sa publiko ang mga ilimnong makahubog atol sa pista Señor tungod kay buot ni Cebu City Mayor Raymond Alvin Garcia ang pagpatuman og liquor ban alang sa Sinulog 2025.

Ang unang coordination meeting alang sa Sinulog 2025 gipahigayon niadtong Biyernes diin gisalmotan sa mga sakop sa law enforcement agencies, Sinulog Foundation Incorporated (SFI), ug ubang hingtungdan nga ahensiya nga maapil usab sa mga committee sa festival.

Matud ni Garcia nga moluwat siya og executive order nga mag-regulate sa pagbaligya sa mga ilimnong makahubog apil ang liquor ban sulod sa pipila ka oras.

Apan nagplano gihapon siya nga tigomon ang consensus sa tanang committee apil  ang mga stakeholder ug posibleng mo implementar og total liquor ban.

Matud ni Garcia nga gikonsiderar niya ang pag-implementar og liquor ban sugod alas 10:00 sa gabii.

Ug gikatakda usab ang pagpahibawo sa pinal nga desisyon sa street party nga mahimong apil na ang pagdili niini o pag-regulate pinaagi sa pag-require og permit.

Si Garcia nagkanayon nga iyang gikonsiderar usab ang pagdili sa pagpahigayon og mga party diha sa mga pampublikong dalan.

Kaniadto, si Konsehal Philip Zafra, chairman sa committee on peace and order sa Cebu City council nipadayag nga imbes ipatuman ang total ban kinahanglang makig-alayon ang mga street parties sa Cebu City government ug sa lokal nga kapolisan.

Si Zafra kinsa nangulo pag-monitor sa kalinaw ug kahapsay sa niaging mga selebrasyon sa Sinulog nagkanayon nga iyang irekomendar ang pagmentinar sa status quo sa niaging mga guidelines.

Apil niini, nga imbes ipatuman ang total ban sa street parties ipasiguro ang saktong koordinasyon tali sa mga gustong mo organisar sa maong mga kalihokan ug sa mga awtoridad sa siyudad.

Matud ni Zafra nga kadtong gustong mopahigayon og street party kinahanglang makakuha og permit gikan sa office of the city mayor aron ma-monitor sa mga awtoridad ang ilang mga kalihokan ug maapil sila sa deployment plans.

Subay niini, gisugyot ni Zafra, pinaagi sa Cebu City administrator nga tapokon ang tanang tag-iya og bar uban sa Business Permits and Licensing Office ug hugtan ang pag-monitor sa maong mga kalihokan.

Gipadayag ni Zafra nga nagsalig sila niini nga plano nga giila nga ang Sinulog usa ka fiesta nga naglakip sa nagkalain-laing matang sa selebrasyon apil niini ang street parties.

Samtang si Garcia nagkanayon nga usa kini sa labing challenging nga Sinulog alang kanila tungod kay gipaabot nga mas daghan ang mga tawo itandi sa niaging mga tuig. — /BDB (BANAT NEWS)