Duha ka lugar sa Negros Occidental nisuspenso sa klase

CEBU, Philippines — Ang Siyudad sa La Carlota ug munisipalidad sa La Castellana sa Negros Occidental nisuspenso sa face-to-face classes kagahapon gumikan sa nagpadayong aktibidad sa Bulkang Kanlaon.

Pinaagi sa Facebook post gipahibalo ni La Carlota Mayor Rex Jalando-on ang pagsuspenso sa in-person nga klase sa tanang lebel sa mga tunghaan nga sakop sa siyudad sugod kagahapon Enero 2 hangtud karon, Enero 3, 2025. 

Si Jalando-on nimando sa tanang tunghaan sa siyudad sa pagpatuman sa blended learning delivery modality niining panahona diin ipadayon sa mga estudyante ang ilang pagkat-on pinaagi sa kombinasyon sa mga online platform ug uban pang mga remote learning tool.

Samtang gipahibalo usab sa kagamhanan sa La Castellana nga hangtud  kagahapon ang pagsuspenso sa mga klase sa tanang lebel sa tanang pampubliko ug pribadong tunghaan nga sulod sa ilang hurisdiksyon wala pa gitangtang tungod sa dili matag-an nga kalihokan sa bulkan.  Base sa update sa PHIVOLCS kaghapon ang Bulkang Kanlaon nagpabiling ubos sa alert level 3 nga nagpasabot nga taas ang posibilidad nga mahitabo ang kalit ug mas kusog nga pagbuto sa bulkan nga makadala og kadaot sa mga komunidad.

Niadtong Miyerkules gitaho sa PHIVOLCS nga dunay pito ka discrete ash emission events, hinungdan sa padayong pagpatuman sa alert level 3 status sa bulkan.

Matud sa ahensiya nga ang mga grayish plumes nisaka sa 100 ngadto sa 200 metros ibabaw sa crater sa wala pa mapalid paingon sa kasadpan base sa naobserbahan sa IP Camera sa Kanlaon Volcano Observatory sa Canlaon City.

Nunot niini, ang NDRRMC nipahimangno sa tanan sa posibleng pagtagak sa abo nga gibugwak sa Bulkang Kanlaon ngadto sa kasadpan sa alas 7:57 sa buntag niadtong Huwebes.