Duha ka andana nga building sa barangay Bulacao nagamit na

CEBU, Philippines — Nagamit na ang duha ka bag-ong opisina sa Barangay Bulacao, Dakbayan sa Talisay.

Duha ka andana nga edipisyo ang nahuman sa pagtrabaho ug gitagana nila ni kapitan Banjo Abastillas alang sa opisina sa Sangguniang Kabataan (SK) ug sa Disaster Team sa Barangay.

Ang ikaduha ka andana alang sa SK samtang ang ubos mao sa Bulacao Lifecare Emergency Team (BULLET).

Si Talisay City mayor Gerald Anthony “Samsam” Gullas maoy usa sa mga bisita atol sa pormal nga paggamit sa mga buhatan.

Matud pa sa mayor nga ang proyekto nagpamatuod sa pagtinabangay sa mga opisyales.

Gibendisyonan sab ang bag-ong bullet rescue van nga mao ang magamit sa disaster team sa pagresponde sa mga emerhensya.

Si Abastillas nipalit og ilaha nga rescue van gawas sa gihatag nga rescue van sa siyudad.

Nalipay si Gullas gumikan sa inisyatibo ni Abastillas ug sa mga kauban sa konseho sa barangay. (BANAT NEWS)