Ayuda sa mga magtutudlo sa Cebu City gipa-release na

CEBU, Philippines — Duha ka adlaw sa dili pa ang pasko gipa-release na si Cebu City Mayor Raymond Alvin Garcia ang P10,000 nga financial assistance alang sa 7,000 ka magtutudlo sa siyudad.

Naandan nga madawat kini sa mga magtutudlo sa buwan sa Pebrero apan karon mas gipasayo pa kini og hatag ni Garcia ang maong ayuda aron nga adunay dugang budget ang mga magtutudlo alang sa pagsaulog sa pasko.

“Historically, ihatag gyud na nato every Christmas pero the past years, gihatag siya every Valentine’s Day”, matud ni Garcia.

Alang kang Garcia nga unang higayon kini sa taud-taod na nga panahon nga sayo ang paghatag ug wala na gilangay ang maong tabang pinansiyal.

Nasayran nga kausa lang sa usa ka tuig makadawat ang mga magtutudlo sa maong tabang pinansiyal.

Sa laing bahin, nasugdan na usab og pagpang-apod-apod ang P5,000 nga bonus alang sa mga job order employee.

Matud pa ni Garcia nga kaniadto madawat kini sa mga JO sa matag buwan sa Enero apan karon mas gipasayo na kini niya.

Gibutyag ni Garcia nga nigahin sila og duha ka adlaw alang sa pagpang-apod-apod sa maong bonus alang sa mga JO.

Gipasalig niya nga sa dili pa motungtong ang petsa 25 niining buwana mahatag na ang maong bonus ngadto sa hingtungdan. (BANAT NEWS)