Ayuman di motambong sa imbitasyon sa Konseho

CEBU, Philippines — Kanhi barangay kapitan sa Pilipinas ug kasamtangan karong Cebu City Public Information Office Chief Ramil Ayuman walay tinguha nga motunga sa pagpatawag kaniya ni Konsehal Joy Pesquera aron sa pagpatim-aw may kalabutan sa paghupot sa dokumento nga may kalabutan sa Tripartite Agreement tali sa Cebu City Medical Center ug sa RBAT Law Firm.

Matud pa ni Ayuman, wala pa siya makadawat sa opisyal nga dokumento may kalabutan sa kamanduan ni Pesquera sa pagtubag tungod kay naka leave pa siya karon ug sa December 1 pa siya mobalik sa trabaho.

Ang maong post nga matud pa gikan sa Cebu Updates giulohan og “P100 MILLION DONATION PARA SA CEBU CITY MEDICAL CENTER (CCMC) NAKIT-AN NA!”

Matud pa sa unod sa post, P100 Million sa nawala nga P205 Million nga donasyon alang sa CCMC gidawat matud pa sa Rama Baena Tan Ang (RBTA) Law Office nga ang partner mao ang anak ni dismissed Mayor Mike Rama nga si Atty Mikel Rama.

“Basaha ang Trust Agreement (posted below) para makita ang garapal nga transaction sa law office sa anak sa mayor (RBTA) involving P100 Million nga pundo para sa CCMC!” tipik matud pa post.

Apan sumala pa ni Ayuman, wala siyay planong motambong sa maong imbitasyon kay matud niya igo ra siya ni repost sa nakita niyang post sa social media.

Ug para niya kinahanglang dunay imbestigasyon nga himuon bahin niini kay dunay mga balido nga pangutana nga kinahanglang tubagon.  IBM BANAT NEWS