Dakung tigum sa charismatic groups himoon dinhi sa Sugbo

CEBU, Philippines — Ipahigayon dinhi sa Sugbo ang kalihukan may kalabutan sa charismatic groups sa simbahan karong sunod buwan.

Usa ka dakong panagtigom sa grupo sa mga charismatic tibuok nasud ang gikatakdang ipahigayon diin mokabat sa tres mil ka mga participants ang mosalmot sa programang gitawag og CHARISCON Philippines 2024 nga himoon sa Oktubre 4 ngadto sa 6 sulod sa IEC Convention Center.

Ang maong kalihukan gi host sa Brotherhood Christian Businessmen and Professionals kon BCBP nga gipangulohan ni Alan Larot uban sa pakig-alayon sa Archdiocese of Cebu Council of Charismatic Renewal Services nga gipangulohan ni Fe Mantuhac-Barino, Chairman sa Commission on Laity.  Mokabat sa siyam ka mga dinapit nga mamulong ang mopaambit sa pagtulon-an atol sa tigom.

Hatagan og gibug-aton ang hagit nga giatubang sa mga Charismatic Groups, ang pagpadilaab sa kainit sa ilang tawag sa serbisyo.

Matud pa ni Barino, nagpadayon pa ang registration hangtud sa September 28 diin mahimo ra mobisita sa IEC3 alang sa ilang pagparehistro. (BANAT NEWS)