Sea water desalination  project sa Punta Engaño sugdan na

CEBU, Philippines — Gihangop sa mga molupyo sa Barangay Punta Engaño  sa Siyudad sa Lapu-Lapu ang gipatuman nga proyekto nga makahatag og kasulbaran sa dugay na kaayong problema nga ilang giatubang nga mao ang kalisod sa tubig nga ilang magamit sa matag adlaw sa ilang tagsa-tagsa ka mga panimalay.

Kagahapon gipahigayon ang ground breaking ceremony alang sa limpiyo ug quality water supply sa gipatuman nga proyekto nga seawater desalination project diha sa Barangay Punta Engaño.

Ang maong ground breaking ceremony gipangulohan kini ni Mayor Junard "Ahong" Chan ug uban pa nga opisyales sa kagamhanan sa siyudad.

Ang maong proyekto usa kini ka joint venture sa siyudad ug sa Summa Water Resources Inc.

Sa maong proyekto ang tubig sa dagat nga parat pinaagi sa pagproseso niini mahimo na kining tab-ang ug limpiyo na nga mahimong mainom sa mga tawo.

Ang Seawater Desalination Plant Project kasamtangan karon nga naghimo sa iyang kaugmaran sa phase 1.

Nasayran nga ang desalination plant nga giugmad diha sa lugar aduna kini capacity nga 15 million liters sa matag adlaw uban usab niini ang 500 cubic meters sa matag adlaw sa  desalination facility sa Isla sa Olango sa Siyudad sa Lapu-Lapu.

Ang maong dapit sa Isla sa Olango maoy nag-una usab nilang suliran sa mga molopyo ang supply sa tubig nga ilang magamit sa matag adlaw nilang paglihok-lihok sa ilang panimalay.

Gitinguha nga mahuman ang maong proyekto ug kapahimuslan na sa mga molupyo  ang maong proyekto sa tuig 2025. (BANAT NEWS)