Tipolo Residences napuy-an na sa mga benepisyaryo

CEBU, Philippines — Hingpit na gayod nga napahimutang ang mga beneficiary sa Tipolo Residences diin kadaghanan kanila mga biktima sa sunog ug mga kanhi nagpuyo sulod sa compound sa Cebu International Convention Center CICC.

Kini maoy naghatag og katumanan sa pangandoy ni suspended mayor Jonas Cortes nga mahatagan og desente ug hamugaway nga kapuy-an ang katawhan nga nagpuyo sa CICC.

Nasayran dunay mokabat sa 700 ka mga residente gikan sa CICC ang ipahiluna sa bag-o nilang pinuy-anan diha sa Tipolo Residences sa Barangay Tipolo.

Gihimo sa mga molopyo sa Tipolo Residences ang Appreciation Day ug panagtapok aron pagpadayag sa ilang pasalamat ni Mayor Jonas Cortes.  Ilang gihulagway nga nindot kaayo ang Housing Project nga Tipolo Residences ni Mayor Jonas Cortes.

Adunay pipila kanila nga nisupak kaniadto nga papahawaon sa CICC apan sila nakamatngon sa dakung kaayuhan nga gihimo ni Cortes alang sa pag-abante sa mga Mandauehanon.

Si acting Mandaue City mayor Glenn Bercede mitug-an nga duna pay mga housing project ubos sa administrasyon ni Cortes ug sa Move Mandaue ang giproseso aron kapuy-an sa katawhan.

Dugang pa sa acting mayor nga dako kaayo ang kausaban sa kalambuan sa siyudad sa Mandaue nga nahan-ay na daan sa wala pa masuspenso si Cortes sa iyang katungdanan. (BANAT NEWS)