Archival nikwestiyon sa P19.8M alang sa rehabilitasyon sa legislative building

CEBU, Philippines — Gikwestyon ni Konsehal Nestor Archival, Sr. ang dul-an sa P20 milyones nga budget quotation nga gisumiter sa Department of Engineering and Public Works alang sa gisugyot nga rehabilitasyon sa city hall legislative building.

Si Archival nikwestiyon sa giingong kakuwang sa plano sa scope of dimensions sa Program of Works and Estimates.

Si Lilibeth del Mar, representante sa DEPW nipadayag sa sa konseho nga lakip sa himuon nga rehabilitasyon mao ang pagpintal og balik sa building, pag-ilis sa aluminum cladding sa rooftop, pag-instolar og wall mount cabinets sa electrical rooms ug pagpalambo sa elektrisidad niini.

Base sa resolusyon nga gipangamahanan ni Konsehal Jerry Guardo, chairman sa committee on infrastructure nga ang gisugyot nga rehabilitasyon nikantidad ngadto sa P19,828,121.

Sa maong kantidad namatikdan ni Archival ang pipila ka wala kinahanglana sa budget sama sa pagkuha sa mga permit.

Matud ni Archival nga dakong pangutana kini nga mo-charge ang contractor alang sa pagkuha og permit.

"Nganong ato mang bayran ang contractor para sa Cebu City?", pangutana ni Archival.

Gipasabot usab ni Del Mar nga ang mga building permit nalakip sa ilang kinatibuk-ang kinahanglanon tungod kay gituyo kini aron maoy sinyales sa pagsugod og pagtrabaho sa rehabilitasyon sa maong building.  Si Archival nisugyot nga han-ayon sa kontrata ang mga himuon nga trabaho sa building.

Gikwestiyon usab ni Archival ang 65 ka set sa RGB lights nga nibalor ngadto sa P10 milyones. "Naunsa mo? Ngano gud tawon magbutang ta’g lights? Giingnan na ta sa COA (Commission on Audit) nga usik-usik ta’g kuryente. That is very expensive, P10 million... Nindot man ning naay lights ba, but is it necessary?", ni Archival pa. Samtang si Guardo nagkanayon nga ang iyang resolusyon gituyo lang sa paggahin sa kantidad apan wala pa sila maka-bid out sa maong proyekto.

Gidepensahan ni Acting Vice Mayor Donaldo Hontiveros ang sestema sa suga diin matud niya nga mahimo kini nga dugang nga atraksiyon sa mga turista. (BANAT NEWS)