CEBU, Philippines - Gigahinan na og P15 milyones ang programa ni Dr. Romulo Davide, uyoan ni Gob. Hilario Davide III nga gitawag og Farmer-Scientists Training Program.
Ang hunta probinsiyal miuyon sa paggahin sa maong kantidad gikan sa wala nagamit nga pundo sa buhatan sa Provincial Agriculturist alang sa Integrated Farming System Development Program (IFSDP) nga gipatuman ni kanhi gobernador, karon Kong. Gwendolyn Garcia.
Ang IFSDP ni Garcia adunay gahin nga P18.3 milyones alang karong tuiga.
Matud pa ni Bise Gob. Agnes Magpale nga adunay P9 milyones nga napagawas nga pundo sa maong programa sa dihang siya ang kasamtangang gobernador niadtong Enero hangtud Mayo apan P3 milyones lang ang nagasto.
Kini nagpakita nga adunay nahabilin nga P15 milyones gikan sa maong gahin sa IFSDP.
Matud pa ni Magpale nga ang provincial agriculturist naghangyo nga ang maong nahabilin nga pundo ibalhin sa FSTP.
Kini gamiton sa pagpatuman sa mga programa sa FSTP lakip na sa insurance sa mga kaumahan ug mga mag-uuma ug sa mga mananagat nga maglakip sa ilang mga ginamiton sa panagat.
Si Gob. Davide sa iyang pakigpulong atol sa inaugural session sa hunta probinsiyal niadtong Hulyo1 kusganong nanawagan sa mga sakop sa paggahin og pundo alang sa FSTP.
Ang iyang uyoan nga si Dr. Davide mao karon ang consultant on agriculture.
Nahimo usab siyang consultant ni Garcia sa maong programa apan naundang sa dihang si Gob. Davide midagan pagka-gobernador niadtong 2010 apan napilde. (BANAT NEWS)