CEBU, Philippines - Patay ang usa ka giingong ex-convict human kini gipusil sa iyang silingan pasado alas 4 kagahapon sa hapon diha sa dalan C Padilla barangay Duljo Fatima ning siyudad sa Sugbu.
Ang biktima nailhan nga si Reynato Lauron, 52, molupyo sa maong dapit samtang gitumbok nga suspetsado mao ang ginganlan og Marlon Dandan molupyo sa sitio Maganda, barangay Mambaling.
Sa pakighinabi sa Banat News ni SPO3 Rey Cuyos , kini miingon nga naglingkod sa taytayan sa maong dapit ang biktima dihang giduol ug gipusil sa makatulo ka higayon sa suspek.
Matod pa ni Cuyos subay sa ilang nakuhang mga impormasyon dako ang ilang pagdudang may kalambigitan sa illegal drugs ang motibo sa pagpamusil.
Nasayran usab ni Cuyos nga adunay kasong pagpangawat ug kaso bahin sa illegal drugs ang biktima kaniadto. (BANAT NEWS)