CEBU, Philippines - Patay nang napalgan ug naglutaw sa dagat ang usa ka tawo nga unang gikataho sa kapolisan nga na-missing sukad pa niadtong miaging Sabado sa hapon human uwahing nakit-ang nanguha og mga scrap iron duol sa usa ka shipyard sa barangay Opao, dakbayan sa Mandaue.
Si Titi Sampan Perosa, 27, taga sitio Paradise sa barangay Looc, dakbayan sa Mandaue patay nga napalgan alas- 6 pasado kagahapon sa buntag nga naglutaw sa kadagatan duol sa VM Cabahug Shipyard, purok Gumamela sa barangay Opao sa maong dakbayan.
Sa pagpakighinabi sa Banat News kang SPO3 Marcos Noval sa Investigation Detection and Management Bureau (DMB) sa Mandaue City Police Office (MCPO) maoy nasayran nga usa ka Pitong Zambo nga nagpuyo sa maong dapit nga mipaingon unta sa VM Cabahug Shipyard aron mamasol maoy nakakita sa patay’ng lawas.
Ang caretaker sa maong shipyard nga si Cal Entrampas daling mitawag sa kapolisan. Ang Scene on Crime Operation (SOCO) nga gipangulohan ni Senior Inspector Esther Herrero miingon nga dunay samad sa iyang agtang ang biktima ug girekomendar nilang ipa-awtopsiya ang lawas niini aron susihon kung may foul play sa kamatayon niini. (BANAT NEWS)