2 magtotroso patay sa pamamaril sa Zamboanga

MANILA, Philippines  - Utas ang dalawang mangtotroso sa isang armadong grupo ng mga lalaki sa Dinas, Zamboanga del Norte, ayon sa pulisya ngayong Lunes.

Pinangalanan ni Chief Inspector Ariel Huesca, tagapagsalita ng Police Regional Office 9 (PRO), ang mga biktimang sina Rodulfo Clarin at Cristopher Tagayan na kapwa residente ng Barangay San Pablo.

Sa imbestigasyon ng pulisya, nagpuputol ng mga puno ng niyog ang dalawang biktima bandang 7 ng umaga sa sitio Campo Uno nang lumitaw ang apat na armado at nakamaskarang lalaki.

Ayon sa mga saksi, nagmakaawa pa ang mga biktima na hwuag silang patayin ngunit hindi sila pinakinggan ng mga suspek.

Isa sa mga nakamaskarang lalaki ang pumaslang sa dalawang magtotroso gamit ang M16 rifle.

Kaagad tumakas ang mga salarin tangay ang chainsaw na ginamit ng mga biktima sa pagpuputol ng mga troso.

Inaalam pa rin ng mga awtoridad ang motibo sa likod ng pagpatay sa dalawang biktima.