MANILA, Philippines – Aabot sa 275 pamilya ang inilikas dahil sa paghagupit ng bagyong "Pablo" sa western Mindanao nitong Martes ng gabi.
Ayon kay Chief Superintendent Napoleon Estilles, direktor ng Zamboanga Peninsula police regioal office, pinakamatinding naapektuhan ang Barangay Vitali sa Zamboanga Sibugay na may anim na purok at 92 pamilya.
Ani Estilles, nawalan ng kuryent at sarado ang mga kalsada sa maraming lugar sa rehiyon dahil sa mga naganap na pagguho ng lupa at biglaang pagbaha dulot ng matinding ulan na dala ng bagyong Pablo.
Aabot sa 45 pamilya naman sa Zamboanga del Sur at 138 sa Zamboanga del Norte ang inilikas mula sa kanilang mga tirahan dahil sa pagbaha.
Sinabi ni Estilles na wala pa namang naiuulat na namatay sa naturang rehiyon.