MANILA, Philippines – Isang 28-anyos na lalaki na hinihinalang isang drug courier ang naharang sa isang checkpoint sa Tabuk City, Kalinga noong nakalipas na linggo.
Lampas kalahating milyong pisong halaga ng tuyong dahon ng marijuana ang nakuha mula kay Merlyn Dangsoy Guimba nang maharang siya ng mga operatiba mula sa isang GL bus na patungong Baguio City sa Baranggay Agbannawag bandang 6:00 ng umaga noong Huwebes.
Sinabi ni Cordillera police director Chief Superintendent Benjamin Magalong, muntik nang makalusot si Guimba sa pagtatago ng 22 piraso ng tuyong bloke ng marijuana na nasa 22 kilo, pero isang impormante ang nagbigay ng impormasyon tungkol sa suspek.
Nahaharap si Guimba sa kriminal na kaso, sabi ni Magalong.
Iniutos din ni Magalong sa kanyang nasasakupan na isagawa ang kanilang anti-drug operations upang maputol ang pag-ikot ng ilegal na droga sa rehiyon.