Nanay na takot sa sariling multo

Dear Vanezza,

Laging tamang hinala ang nanay ko na ayaw akong payagan na sumama sa BF ko na kami lamang kahit na magsimba. Gusto niya ay lagi kaming may chaperon. Takot sa sariling multo si nanay na palibhasa ay gawain niya na makipagkita sa kanyang kabit ngayong nakabalik na sa abroad si tatay. Naiintindihan ko si nanay, pero hindi ko maalis na magalit at sumbatan siya sa ibinibintang niya na puwede kong gawin. Ano ba ang maipapayo ninyo? – Lei

Dear Lei,

Natural sa isang nanay ang mag-alala at protektahan ang kanyang anak na babae. Tulad ng sabi  mo ay takot si nanay na baka ikaw din ay maligaw ng landas katulad niya. Bakit hindi kausapin si nanay na paalalahan na mali ang kanyang ginagawa. Baka sakaling matauhan sa kanyang kahibangan.

Sumasainyo,

Vanezza