Tinatabangan kay Misis

Dear Vanezza,

Ang tigas ng ulo ng misis ko kahit dalawang buwan pa lang nakapanganak. Ayaw kumain ng gulay at prutas. Imbes na sabayan sa tulog ang baby namin sa madaling araw, nagigising ako ng 2 a.m. panay pa ang Facebook. Sa boarding house ako naglalagi. Bukod sa iwas late ay naiinis din ako na panay ang away namin kahit sa maliit na bagay. Umuuwi lang ako dahil para sa anak namin. Bigla akong natabangan sa misis ko. Hindi niya inaasikaso ang anak namin. Hindi rin ako pinagsisilbihan. Akala niya ay dalaga pa rin siya. Samantalang pareho lang naman kaming 30 years. Nagsisisi tuloy ako siya ang napangasawa ko. – Jimmy Boy

Dear Jimmy Boy,

Ang pag-aasawa ay talagang hindi kaning isusubo na kapag napaso ay saka iluluwa. Ikaw ang mister at leader ng nagsisimula ninyong pamilya. Magpakatatag ka at tulungan mo si misis na makita ang kahalagahan ng inyong pamilya. Kung kailangang mag-under go kayo ng marriage counseling ay mas maganda, para maayos ang problema dahil tandaan mo na iisa na kayo ngayon bilang mag-asawa ni misis.

Sumasainyo,

Vanezza