Takot mag-isa sa buhay

Dear Vanezza,

Tawagin mo na lang akong Dyna, high school graduate. Sa edad kong 33 ay hirap na akong makahanap ng trabaho. Nais ko pong makaipon at makapagpatuloy ng aking pag-aaral. Ako na lang ang walang asawa sa aming magkakapatid. Ang aking mga magulang na lamang ang aking kasama sa buhay at matatanda na rin naman sila. Wala po akong magandang kinabukasan na masasabi at natatakot ako kung ako ay mag-isa na lang sa buhay. Ano pong mabuti kong gawin?

Dear Dyna,

Puwede kang pumasok sa mga non-governmental organizations bilang volunteer kung saan puwede kang maging produktibo o kaya’y mag-aral sa TESDA para matuto na puwede mong magamit sa paghahanap ng trabaho. ‘Wag kang matakot. Nasa edad ka na para magdesisyon sa iyong sarili. Sa halip malungkot, magpasalamat ka sa Dios at nakakapiling mo pa ang iyong mga magulang. Manalangin ka sa Dios na gabayan ka Niya. Maaaring may maganda siyang plano para sa’yo.

Sumasaiyo,

Vanezza