Ayaw ng ‘pre-marital sex’

Dear Vanezza,

Dalawa na po ang naging bf ko sa edad kong 25. Ang nakakalungkot lang, ako ang kinakalasan ng mga naging karelasyon ko. Hindi ko maintindihan kung bakit. Ang una kong bf, ang inayawan sa akin, masyado raw akong pakipot kaya naghanap siya ng iba na higit daw na nakakaunawa sa kanyang “passion”. Ang ikalawa, wala raw akong tiwala sa kanya. Isa raw akong “frigid” at hindi ko matugunan ang init ng kanyang pagmamahal. Hindi ako “frigid”. Ang alam ko lang, pinangangalagaan ko ang aking sarili at hindi dapat padala sa kapusukan. Para sa akin, kasal muna bago honeymoon. Ito ang mahigpit na bilin ng nanay ko at lola sa akin. Tawagin na nila akong frigid at makaluma, basta tutol ako sa pre-marital sex. - Pia

Dear Pia,

Nakakabilib ang matibay mong paniniwala sa iyong prinsipyo at pagrespeto sa sarili. Bagaman moderno na ang kaisipan ngayon ng mga kabataan, ang paniniwala mong ito ay hindi maituturing na sinauna dahil iniingatan mo ang puri na siyang  nais mong ihandog sa yong mapapangasawa. Mapalad ang binatang iibigin mo at makakatupad sa iyong sinusunod na prinsipyo. Keep it up at hindi ka malilihis sa landas na tinatahak mo sa buhay.

Sumasaiyo,

Vanezza