Sana dalawa ang puso ko

Dear Vanezza,

Mayroon akong dala­wang nobya. Ang isa ay tunay kong mahal at ang isa ay hindi ko masyadong feel. Kum­baga, palipasan ko lang ng oras. Nagkasundo na kaming pakasal ng isa kong kasintahan sa May 2013. Pero bigla akong nagkaproblema. Ang hindi ko maintindihan isang gabi na lasing ako, napilit ako ng isa kong gf na mangakong pakakasalan ko siya. Ngayo’y dalawa ang umaasang pakakasalan ko sila pero alam ko naman na hindi ito puwede. Ano ang gagawin ko? - Noli Boy

Dear Noli Boy,

Ang dapat mong gawin ay bawiin mo ang pagako mo sa isa na hindi mo talagang mahal. Iyan ang masamang epekto ng alak. Masyadong madulas ang dila. Malaking problema iyan kaya habang maaga ay lusutan mo na bago pa tuluyang lumaki at lumikha ng mas ma­laking perwisyo. Maging aral sa’yo na kung wala ka rin lang pag-ibig sa isang babae, huwag mo nang ligawan para gawin lang palipasan. Isipin mo ang karma. Kung wala ka mang kapatid na babae, maaaring magkaanak ka ng babae at baka siya ang buweltahan ng kapalaran sa kalokohang ginagawa mo.