Ginugutom ang mga anak

Dear Vanezza,

Tawagin mo na lang akong Marjie, 28, may asawa. Ang problema ko ay tungkol sa asawa kong babaero at lasenggo. Malaki sana ang kita niya bilang supervisor pero wala kaming naiipon dahil sa mga bisyo niya. Parang nagsisisi ako ngayon. Madalas na rin kaming nag-aaway dahil sa kakapusan ng pera. Tinatakot pa niya ako na kung ayaw ko na sa kanya ay lumayas daw ako. Hindi ko naman magawa dahil sa dalawa naming anak na maliliit pa. Ngunit madalas dumanas ng gutom ang mga anak ko gawa ng asawa ko dahil ang inuuwi niyang pera ay kulang na kulang sa aming pangangailangan. Ang sabi sa akin ng magulang ko puwede akong bumalik sa kanila at isama ko ang aking mga anak. Hiwalayan ko na raw ang aking asawa. Tama ba ang payo nila?

Dear Marjie,

Kung alang-alang sa mga anak mo, sundin mo ang iyong mga magulang. Bagamat hindi natin pinapaboran ang paghihiwalay ng mga mag-asawa, pero kung ang mister mo ay taksil na at pinagkakaitan pa kayo ng sustento, may laya kang gawin ito. Kung tutuusin, ang unfaithfulness at pagiging lasenggo ay isang matibay na ground sa pagpapawalang-bisa ng kasal o annulment. Sa ngayon, ang dapat mong intindihin ay ang kinabukasan ng iyong mga anak.

Sumasaiyo,

Vanezza