Baka lokohin lang

Dear Vanezza,

Ako si Dayana, 17 years old at taga Divisoria. Iniwan ko ang aking pamilya sa Cebu para mamasukan dito. Isa po akong tindera sa palengke. May manliligaw po sa akin, isang nagdedeliber ng gulay na itinitinda ko. May crush po ako sa kanya kaya lang baka lokohin lang ako kasi mukha po siyang playboy. Mababa lang aking pinag-aralan at tagapagtinda lang ako ng totoong may-ari ng tindahan. Niyayaya niya ako mag-date kami. Manonood daw kami ng sine at kakain sa labas. Mahal ko rin siya pero natatakot ako.  Paano ko ba malalaman kung tapat at hindi manloloko ang isang lalaki? Sana matulungan mo ako.

Dear Ida,

Bata ka pa at huwag agad padala sa nararamdaman mo. Hindi mo pa siya lubos na kilala kaya huwag agad sumasama sa date. Kadalasan, kapag nakuha na ng lalaki ang kanyang gusto sa babae, bigla na lang lalayasan. Kilalanin mo muna siyang mabuti. Mag-ingat ka dahil wala rito ang iyong mga magulang at kaanak kaya walang ibang mangangalaga at magmamalasakit sa iyo kundi ang iyong sarili.