Karen at Migs, itatampok ang mga matagumpay na negosyo sa Baguio  

MANILA, Philippines — Iba’t ibang pasyalan, aktibidad, at mga sikat na kainan sa Baguio City ang tutuklasin nina Karen Davila at Migs Bustos sa My Puhunan ngayong Sabado (Hunyo 8).

Samahan sina Karen at Migs sa kanilang pagbisita sa mga kainan na may magandang dining experience tulad ng The Barn, Cantina, at ang restaurant ng National Artist na si Kidlat Tahimik na Oh My Gulay.

Malalaman din nina Karen at Migs ang mga kuwento sa likod ng mga sikat na pasalubong mula Baguio tulad ng tinapay na pasas o raisin bread ng Baguio Country Club, ang mga pastry ng Victoria Bakery, at ang strawberry jam ng negosyanteng si Annie Estrellado.

Bibisitahin din nila an Pilak Silvercraft and Gift Shop, ang tindahan na hindi pinapalampas ng mga turistang mahilig sa accessory, Wright Park, at ang Igorot Stone Kingdom. Kikilalanin din nina Karen at Migs ang chalk artists na palaging nagpapakita ng kanilang mga likhang sining sa Session Road.