Ina at mga anak, ibabangon ang amang adik…
MANILA, Philippines — Magtutulungan ang isang pamilya na ibangon ang mismong haligi ng kanilang tahanan matapos itong malulong sa droga ngayong Sabado (Mayo 26) sa Maalala Mo Kaya.
Sa magkakapatid, pinaka-close ang kambal na sina Bea (Alexa Ilacad) at Nina (Michelle Vito) sa amang si Robert (James Blanco). Lahat ng luho at gusto nila sa buhay ay palagi nitong ibinibigay. Para sa kambal, ang tatay nila ay isang maaasahan at huwarang ama.
Ngunit isang araw, bigla na lamang hindi umuwi ang kanilang ama dahil nagkasakit daw ito. Hindi naman sila pinabayaan ng inang si Evy (Denise Laurel) sa pagkakataong ito. Lilipas ang ilang taon at muling babalik si Robert sa tahanan nila.
Manunumbalik ang saya ng mag-anak ngunit agad ding mawawala nang madiskubre ng magkakapatid na hindi pala nagkasakit ang ama kung hindi nalulong at patuloy pa rin itong nasasadlak sa masamang bisyo.
Paano tatanggapin ng kambal ang kinahinatnan ng amang pinaka-iidolo? Paano kaya nila ito matutulungang makaahon?
Makakasama rin sa upcoming episode sina Marina Benipayo, Alysson McBride, Krystal Mejes, Kyle Echarri, Luke Alford, Mari Kaimo, at Christian Moroñes.
Ang episode ay sa ilalim ng direksyon ni Nuel Naval at panulat ni Akeem del Rosario. Ang MMK ay pinamumunuan ng business unit head na si Roda C. dela Cerna.
- Latest
