Angelu naka-recover na sa Bell’s Palsy

Nakakatuwa magaling na ang Bell’s Palsy ni Angelu de Leon kaya makakalabas na naman siya sa telebisyon. Matatandaang nangyari iyan sa aktres noong Nobyembre noong nakaraang taon.

Iyang Bell’s Palsy ay paralysis ng isang bahagi ng mukha, na hanggang ngayon ay hindi naman matiyak kung ano talaga ang dahilan. Ang sinasabi nga lamang sa mga pag-aaral ay epekto ng inflammation.

Iba iyan doon sa nangyayaring paralysis ng mukha kung nagkaroon ng stroke, o kaya ‘pag inatake sa puso. Iyang bell’s palsy kasi ay gumagaling rin naman ng kusa, hindi mo nga lang alam kung gaano katagal. Dapat din patingnan agad sa doctor para malaman kung Bell’s Palsy nga lang o baka naman nagkaroon ka na ng isang mild stroke, o atake sa puso.

Hindi rin naman daw iyan ang unang atake ng Bell’s Palsy kay Angelu. Nagkaroon na rin daw ng ganyang sitwasyon noong 2009 kaya dapat nga siguro mas maging maingat siya at sumailalim na sa mas matinding medical check up para hindi na maulit. Bata pa si Angelu, at isang magaling na aktres. Pero aminin natin na bilang aktres, ang puhunan din niya ay ang kanyang mukha. Kung mangyayari nga ang ganyan, at maaapektuhan pati ang kanyang pagsasalita, matitigil din pati ang kanyang trabaho.

Nakasama na siya sa pagsisimula noong Encantadia, pero naputol nga ang role niya dahil nga sa nasabing sakit.

Iyong mga matatanda noong araw, ang sinasabi naman ay dahil daw iyan sa tinatawag nilang “pasma”. Minsan daw pagod o galing sa initan, tapos nakakapaghilamos, kaya napapasma. Sa panahon ngayon na marami na ang mga doctor na nag-aral, sinasabi nilang wala naman daw “pasma” talaga.

Kailangan na nga lang sigurong mas maging maingat.

Eula namangka sa GMA at ABS

Kahit na nga siguro kontrabida si Eula Valdez sa Encantadia, tumatak na muli ang kanyang perso­nalidad at nagpakita naman siya ng kahusayan bilang si Avria sa nasabing serye. Ngayon ay balik ABS-CBN na siya. May gagawin siyang drama series. Ibig sabihin kaya nun ay mawawala na siya sa Encatadia?

Joaquin Garcia nag-iba na ang hitsura

After so many years, nakita naming muli si Joaquin Garcia ng That’s Entertainment noon. Hindi namin siya nakilala dahil iba na ang hitsura ngayon. Pero guwapo pa rin at kumakanta pa rin pala siya.