Mga nasasayang na kanin sa karinderya babantayan ng ID!

MANILA, Philippines - Ngayong Huwebes, susuriin ng Investigative Documentaries ang pagkasayang ng mga butil ng kanin sa bansa.

Tatlong beses isang araw, nasa mesa ng karamihan ng pamilyang Pilipino ang kanin. Pero sa araw-araw, kada Pilipino raw ay nagsasayang ng tatlong kutsarang kanin. Katumbas ito ng mahigit tatlong kilo kada tao, kada taon, ayon sa Food and Nutrition Research Institute (FNRI).

Para sa magkaibigang Marimar at Pacquiao, ang bawat almusal, tanghalian, at hapunan ay resulta ng maraming oras ng hirap. Iniikot nila ang Binondo at Delpan sa Maynila para manghingi ng kanin sa mga karinderya. Gumagawa rin si Marimar ng paraan para makapag-uwi ng kanin sa mas bata pa niyang kapatid.

Kabilang ang mga gaya nina Marimar at Pacquiao sa mahigit isa at kalahating milyong pamilya na walang sapat na kita para bumili ng pagkain, ayon sa National Statistical Coordination Board (NSCB).

Tatlong karinderya ang binantayan ng Investigative Documentaries. Paano nasasayang ang kanin sa ganitong uri ng negosyo? Sa bawat bahay, saan nangyayari ang pagkasayang ng mga butil? Alamin ang sagot ngayong Huwebes, Pebrero 12, 8:00 ng gabi kasama ang 2013 Metrobank Journalist of the Year na si Malou Mangahas sa GMA News TV Channel 11.