Kris Aquino tiyak hindi matutuwa Mga senior citizen sa Makati libre sa panonood ng sine sa MMFF

Sosyal ang mga senior citizen sa Makati City dahil libre ang panonood nila sa mga sinehan.

Ewan ko lang kung libre din ang mga Makati City senior citizen kapag pinanood nila ang mga pelikula na kasali sa Metro Manila Film Festival 2014.

Libu-libo ang bilang ng mga senior citizen sa Makati City. Imposible na hindi mapuno ang lahat ng mga sinehan sa Makati kapag sabay-sabay sila na nanood ng sine.

I’m sure, hindi matutuwa si Kris Aquino kung sabay-sabay na panonoorin ng lahat ng Makati senior citizens ang kanyang MMFF movie dahil malaking kabawasan ‘yon sa kikitain  niya bilang co-producer.

Merry christmas everyone…

Merry Christmas everyone!!! Pagpalain nawa tayong lahat ng Maykapal at sana, maramdaman at malaman natin ang tunay na kahulugan ng Pasko.

Isapuso at isaisip natin ang mga mabubuting aral na dulot ng kaarawan ni Hesu Kristo. Ang sabi nga Niya, love one another…

Best actor nomination ni ER, sulit

Worthy of a best actor nomination ang ac­ting ni ER Ejercito sa Muslim, Magnum .357 at ayon ito sa mga umapir sa premiere night ng kanyang pelikula sa SM Manila noong Tuesday night.

Lalo raw humusay ang acting ability ni Papa ER at posibleng may kinalaman ang mga pagsubok sa kanyang personal at political career.

Hindi biro ang mga pinagdaanan ni ER,  partikular ang pagbaba niya sa puwesto bilang gobernador ng Laguna.

Knowing ER, babalik siya sa mundo ng pulitika sa 2016 at babawiin niya ang posisyon na nawala sa kanya.

Si Sam Pinto ang leading lady ni ER sa Muslim, Magnum .357.

Ang Magnum .357 ang biggest movie break ni Sam dahil hindi dekorasyon ang karakter na ginampanan niya.

Puwede nang i-claim ni Sam na hindi lamang pagpapaseksi ang talent niya dahil challenging ang kanyang role sa filmfest entry ni ER.

Caviar cake na bigay ni James at Mikaela, ibinandera ni Kris

Alam na ng buong mundo na caviar cake ang Christmas gift ng mag­dyowang James Yap at Mikaela Cazzola kay Kris Aquino dahil ibinandera nito sa social media ang picture ng cake.

At dahil Kris Aquino is Kris Aquino, naging big deal ang caviar cake na natanggap niya mula sa kanyang ex-husband at sa Italian dyowa nito. ‘Yun lang!

Jinggoy at Bong may party sa kulungan kasama ang pamilya

Mga malalapit na kaibigan at ang kanilang pamilya ang mga bisita nina Senator Bong Revilla, Jr. at Senator Jinggoy Estrada sa kanilang first ever Christmas party sa loob ng kulungan na mangyayari ngayon.

Hindi puwedeng intrigahin ang magaganap na Christmas party dahil legal ito as in may permiso mula sa Sandiganbayan.

Tulad nang dati, may oras ang pagdalaw kina Bong at Papa Jinggoy na ni sa panaginip, hindi sumagi sa kanilang isip na darating ang araw na magdiriwang sila ng Pasko at Bagong Taon sa loob ng kulungan.

Kung may nami-miss si  Bong, ito ay ang paggawa ng mga pelikula para sa Metro Manila Film Festival. Dalawang taon nang walang entry sa MMFF si Bong dahil sa mga kaso na ibinibintang sa kanya.