Direktor na-lock sa CR

MANILA, Philippines - ‘Kaaliw ang nangyari sa isang taping kahapon. Na-delay ang taping dahil nakulong sa comfort room (CR) ng kanilang location ang direktor ng show.

Nagtaka ang staff ng show dahil sa tagal ni Direk sa loob ng CR, akala pa naman nila ay kung ano na ang nangyari rito, pero nang i-check ay nalamang nasira pala ang lock ng CR kaya hindi makalabas ang direktor.

Mismong staff ay nahirapang buksan ang pintuan. Nang makalabas ng CR, natawa na lang ang lahat.

Walang makapagreklamo dahil tie-up lang ang kanilang location, walang binayaran, kaya quiet na lang ang lahat.

Mother Lily nagpa-manage ng events place sa grupo ni LT

Tama ang desisyon ni Mrs. Lily Yu-Monteverde na kunin ang grupo nina Lorna Tolentino at Lyn Cruz (misis ni Tirso Cruz III) para mag-manage ng events place niya sa dating eskuwelahan niya sa tabi mismo ng lumang opisina ng Regal Entertainment, Inc. sa may Valencia St., Quezon City, tapat ng Sampaguita mansion ng mga Vera-Perez.

Valencia Place ang pangalan ng lugar at bukod kina LT at Lyn, kasama nilang nagma-manage ng lugar ang anak ng veteran actress na si Gloria Romero, si Maritess Gutierrez, na siya ring chef ng lugar, pati ang kapatid ng yumaong si Francis Magalona na si Maricar Magalona-Martinez, at si Bernadette Fabian.

Bukod kay LT, mga kaklase ng misis ni Tirso sa St. Paul’s ang ibang managing partners ng Valencia Place.

Kagabi ang una nilang event sa lugar na ’yon, ang 62nd birthday ni Tirso.

Sarah hindi sinamahan ni Richard magbalik-TV show sa GMA

Kahapon ang welcome back production number ni Sarah Lahbati sa Sunday All Stars (SAS) ng GMA 7.

Binigyan ng importansiya ang pagbabalik ni Sarah sa kanyang mother network pagkatapos nilang magkaroon ng demandahan ni Atty. Annette Gozon-Abrogar na nauwi rin sa pag-aayos.

May fans na nag-akalang isu-surprise ng boyfriend na si Richard Gutierrez si Sarah sa SAS kahapon. Pero wala si Richard dahil tanging si Sarah lang naman ang nagbalik-Kapuso Network.

Pero wala man sa SAS si Richard, suportado naman niya at ng buong pamilya Gutierrez ang pagbabalik-showbiz ng girlfriend.

May special participation nga pala si Sarah sa reality TV show ng pamilya Gutierrez, ang It Takes Gutz to be a Gutierrez na malapit nang ipalabas sa E! international channel.