James natupad ang birthday wish!

Nora CalderonHappy Valentine’s Day everyone and Happy Birthday to Ms. Kris Aquino today. From a close friend of Kris, nalaman na­ming pinayagan niyang nasa former husband niyang si James Yap ang mga anak na sina Bimby at Joshua bukas, birthday naman ni James. Bale may dalawang reason para maging masaya ang birthday celebration ni James, nanalo ang kanilang San Mig team para makapasok sa finals ng Philippine Basketball Association (PBA), at makakasama niya ang mga anak niya sa birthday niya. Lagi raw ganoon si James, kapag gusto niyang makasama si Bimby, niri-request din niya kay Kris na makasama si Joshua na naging very close na rin siya.

Aicelle Santos pinapangarap si Dennis

Binati namin si Aicelle Santos sa success ng second musical play niya, ang Rak of Aegis. Everytime na napapadaan kami sa PETA Theater tuwing may weekend shows doon, laging traffic sa lugar dahil may matinee shows sila kaya full-packed ang theater. Thankful naman si Aicelle dahil ibang experience naman ang nararamdaman niya tuwing may show dahil right there and then, nakikita mo ang reaction ng audience sa kanilang performance. Utang na loob daw niya sa mag-asawang Robert at Isay Seña ang pag-arte niya sa stage dahil tinutukan siya ng mga ito. 

Natanong din namin si Aicelle kung wala na ba ang grupo nilang La Diva? Desisyon na raw nila nina Jonalyn Viray at Maricris Garcia, to go on their separate ways pero magkakasama pa rin sila sa Sunday All Stars. Proud daw siya sa success na natanggap ng La Diva at wish daw niyang igawa sila ng concert ng GMA Artist Center. Sa hindi naman niya nakuha ang role na in-audition niya sa Miss Saigon, lahat daw nang nangyayari sa buhay niya ay ipinagpapabahala niya kay Lord. Kaya hindi siya nalungkot dahil ang lahat ng iyon ay Kanyang desisyon.

Ngayon daw na pinasok na niya ang acting bukod sa singing, nakagawa na rin siya ng ilang soap. Pero ang kanyang dream, makasama sa isang soap si Dennis Trillo na para sa kanya ay napakahusay na actor. Wish ni Aicelle sa coming birthday niya on February 24, makagawa ng solo album. May album sila noon ng La Diva sa GMA Records.

Derek naluha sa mga bungong nagkalat sa Tacloban

Naging misty-eyed si Derek Ramsay nang makausap namin bago ipina-preview ng TV5 ang last episode ng Studio 5 Original Movies, ang Bawat Sandali nila ni Angel Aquino na mapapanood sa Tuesday, February 25. Naikuwento niyang nagpunta siya sa imbitasyon ng Gabay-Guro headed by Chaye Revilla, sa Tacloban City para kumustahin ang kalagayan ng mga teachers na affected ng bagyong Yolanda doon. Nakita raw nilang kahit masaya ang mga teachers habang nagpo-programa sila, alam nilang pag-alis nila babalik na naman ang lungkot at walang kasiguraduhan ang kanilang kalagayan. Para kay Derek, hindi dapat ma-experience ng mga tao roon ang nangyari, nakita nilang nalinis man ang mga kalye, ang mga debris ay parang itinabi lamang sa daan at may mga bungo ng tao silang nakita roon.