Itinatago ang pagdadalamhati, Regine pagkatapos na ng concert totodo sa pag-iyak!

Pinipigil ni Regine Velasquez-Alcasid na umiyak sa kabila ng lungkot dahil sa pagyao ng pinakamamahal niyang ama. Hindi raw siya puwedeng umiyak hanggang sa kanilang Valentine concert ni Martin Nievera na Voices of Love sa February 14 sa SM Mall of Asia Arena dahil ayaw niyang mawala ang boses niya. Biro na lang niya, iiyak na lang siya pagkatapos ng kanyang concert. Kakantahin ni Regine ang favorite song ni Mang Gerry na Leader of the Band at wish daw niya ay hindi siya maiyak habang kinakanta iyon.

Bukas ang interment ni Mang Gerry sa Manila Memorial Park sa Plaridel, Bulacan na doon din ang wake ngayon.

Deniece itinanggi ni Mel Tiangco

Nagsalita na ang news anchor ng GMA News & Public Affairs na 24 Oras na si Ms. Mel Tiangco na hindi nila kilala at wala silang relasyon ng kanyang mga anak kay Deniece Cornejo. Idinawit ng mga bashers ang pangalan nila dahil Cornejo ang surname ng mga anak ni Mel. Kahit nga si Ms. Jessica Soho, may nangba-bash din na kinukuwestiyon kung ano raw ang alam nito tungkol sa CCTV camera, nang nauna silang nag-report sa State of the Nation news program sa GMA News TV. Kung saan tugma ang findings sa CCTV at sa deklarasyon ni Vhong Navarro tungkol sa pambubugbog sa kanya. Si Jessica pa kaya ang magri-report tungkol sa CCTV camera kung hindi niya alam ang tungkol doon?

Marian sinugod ng fans sa condo

Nagulat si Marian Rivera early morning kahapon, pagbaba niya ng kanyang condominium unit ay may anim na fans ang naghihintay sa kanya sa lobby. Gusto raw nilang magpa-picture kay Marian. Hindi pumayag si Marian dahil hindi siya nakaayos, papunta siya sa early call time niya ng taping ng soap niyang Carmela. Tama lang naman si Marian dahil kapag pumayag siyang magpa-picture sa kanila na hindi siya nakaayos, ipu-post nila iyon at lalait-laitin na naman siya ng mga haters niya. 

Duda namin, hindi sila mga fans ni Marian dahil hindi nila alam na bawal siyang puntahan sa kanyang condominium. Kaya sinabihan ni Marian ang guard na kaya doon siya lumipat ay gusto niya ng privacy, tapos umagang-umaga may pinapasok na fans ang guard. Nag-sorry daw ang guard at nangakong hindi na mauulit iyon. 

Anyways, kung gabi-gabi sa primetime slot ay pinakikilig kayo nina Marian at ng leading man niyang si Alden Richards sa Carmela, mamayang 6:00 p.m., for the first time magkasama silang maggi-guest sa Mars, sa GMA News TV with hosts Camille Prats and Suzi Entrata.