Goodbye 2013 Claudine nawalan ng career sa‘ginawa’ ni Gretchen!

Tapos na ang taong 2013. Mabuhay ang Bagong Taon! Ganyan ang lagi nating sinasabi pagdating ng mga ganitong araw. Mamaya lamang makakarinig na naman tayo ng malalakas na putukan para salubungin ang Bagong Taon. Hindi kami pabor sa paggamit ng malalakas na paputok pero hindi na nga yata natin maiiwasan iyon.

Sa pagkakataong ito, gusto naming balikan ang mga personalidad na nakagawa ng pinakamalala­king balita sa showbiz. Iba’t iba ang opinion ng mga tao, ang mga ito lang ang choices namin.

Pinakamalaking showbiz newsmaker sa taong nakaraan ang aktres at ngayon ay Miss World na si Megan Young. Nakaagaw siya ng mga headline, hindi lamang dito sa ating bansa kundi ganoon din sa buong mundo. Siya rin ang kauna-unahang beauty queen na nagsalita sa wikang Filipino para magpasalamat matapos na manalo ng international title.

Hindi lamang isang beauty queen si Megan, isa rin siya sa mga nagsimula ng fund-raising para sa mga biktima ng bagyong Haiyan sa Eastern Visayas. Nakipagtulungan siya sa Philippine Red Cross sa paghahatid ng tulong na iyon sa mga nasalanta ng bagyo.

Si Megan ang talagang nakapagbigay ng da­ngal sa mga Pilipino sa taong nagdaan. Sinasabi ngang ang kanyang panalo ay nagsilbing relief sa mga hindi magagandang balita na nagmula sa ating bansa.

Pinag-usapan din naman ang sunud-sunod na sex scandal sa ating bansa. Matagal na pinag-usapan ang sex video ng singer na si Chito Miranda ng bandang Parokya ni Edgar at ang kanyang girlfriend na dating ABS-CBN star na si Neri Naig. Kumalat ang nasabing sex video sa Internet at ma­ging sa mga cell phone. Humingi ng tulong si Chito sa NBI (National Bureau of Investigation) para ma­sugpo iyon pero hanggang ngayon wala pang nababalitang nahuli o naidemanda dahil sa kumalat na sex video.           

May kumalat din namang sex video ang komed­yanteng si Wally Bayola, kasama ang isang dancer ng EB Babes, ang mga resident dancer ng kanilang show na Eat Bulaga. Hindi na kumibo si Wally matapos na kumalat ang kanyang sex video. Humi­ngi siya ng apology sa publiko at nanahimik na lang.

Pero ngayon ay marami ang humihiling na pabalikin na si Wally.

Isang malaking eskandalo rin ang labanan ni Claudine Bar­retto at ang kanyang mga kapatid, lalo na ang na­ka­­­tatandang kapatid na aktres na si Gretchen Barretto. Nauwi iyon sa pagsisiraan ng mga mi­yembro ng kanilang pa­milya, at hanggang nitong huli, tumestigo pa si Gretchen pabor kay Raymart Santiago.

Si Gretchen ay patuloy na tumatakbo ang career, samantalang si Claudine, nawala na ang career bago pa man nagsi­mula ang mga problema nila at hanggang ngayon ay hindi pa rin nakakabalik. Iyong mga sinasabi niyang mga proyektong gagawin niya ay hindi naman natuloy lahat.

Siyempre nakalikha rin naman ng malaking ba-lita ang mga artistang tumulong nang husto sa mga biktima ng bagyong Haiyan o Yolanda. Mabilis na nagbigay ng sampung milyong piso para sa mga biktima ang Megastar na si Sharon Cuneta. Nakitang nagbabalot ng relief goods bilang isang volunteer at ibinigay pa ang vintage car ng aktres na si Angel Locsin. Ang totoo, maraming iba pa ang tumulong, at lahat naman sila ay okay, maliban doon sa mga tumulong para lamang magkaroon ng publisidad na alam naman natin kung sinu-sino.

Marami lang kasi silang pictures pero walang nagsabi sa mga biktima na talagang nakita ang pagtulong nila o may natanggap mula sa kanila.