Aktor iniiwasan nang kausapin ng mga kasamahan dahil sa baho ng hininga

Gaano kaya katotoo ang balitang nasagap namin na noon pa man ay nababalita nang may mabahong hininga ang aktor. Kuwento kasi ng isang source na kahit ang seksing aktres ay umiiwas na makipag-usap dito at kapag kausap ang aktor ay medyo lumalayo ang aktres o kaya’y ’di sinasadyang tinatakpan ang ilong.

Hindi kaya aware ang aktor dito? Sayang, guwapo pa naman siya at malakas ang appeal.

Solenn, nag-enjoy sa India

May bagong pelikulang ipalalabas si Solenn Heussaff kung saan naiiba ang tema. Pinamagatang Mumbai Love, isa itong love story - tungkol sa isang lalaki at babae na nagmula sa dalawang magkaibang daigdig, mula sa dalawang bansa at kultura na hahamakin ang lahat maging lahi man at tradisyong mana, matupad lang ang pag-ibig na tunay.

Gagampanan ni Solenn ang karakter ni Ella na isang businesswoman na siyang namimili at umaangkat ng mga accessories para sa isang jewelry shop sa Makati. Dadalhin siya ng kanyang gawain sa Mumbai, India kung saan dun pala niya matatagpuan ang lalaking magpapatibok ng puso.

Makikilala ni Solenn o Ella si Nandi na isang Indian na naniniwala na matatagpuan nito ang kanyang makakaisang-puso sa pamamagitan ng kapalaran.

Dadalhin ng binata si Ella sa magagandang ta­nawin sa bayan ng Mumbai gaya ng center of arts and culture, mga sagradong templo, museum at historical sites at hahanga si Ella sa mga tao dun bukod pa sa magagandang tanawin. Hahanga siya sa kabaitan ng kanyang tour guide na si Nandi hanggang sa siya’y umibig dito.

Pero masusubukan kung hanggang saan katapat ang kanilang pag-ibig nang bumalik na ng bansa ang dalaga. Pero susundan ni Nandi ang nobya sa Maynila at muling ipagpapatuloy ang kanilang pagmamahalan.

Pero mapagbiro ang tadhana at mu­ling susubukan ang katatagan ng kanilang pag-ibig sa kabila ng pagkakaiba ng kanilang kultura.

Paano kaya malalampasan ng dalawa ang kanilang pagsubok? Ito ang sasagutin sa pelikulang Mumbai Love na prodyus ng Capestone Pictures Inc. at release ng Solar Entertainment Corporation.