Tatapusin na ba ni Xander ang kanyang misyon?

MANILA, Philippines - Kung kailan bukas na ang puso ni Yonna para kay Xander matapos siya nitong sagipin mula sa tangkang paglunod sa kanyang sarili sa ilog ay saka naman siya babagabagin ng kanyang konsensiya dala ng kanyang pagpapanggap sa pagpapatuloy ng kuwento ng pag-ibig, pag-asa, at panlilinlang sa nangungunang primetime Asianovela na That Winter, the Wind Blows.

Mas napapalapit na nga ang loob ni Xander kay Yonna sa mas napapadalas nilang pagba-bonding bilang “magkapatid.” Lingid sa kaalaman niya na mas naibabahagi niya na ang kanyang sarili kay Yonna na maging ang pinakatatago niyang sakit na dulot ng pagkawala ng babaeng kanyang pinakamamahal ay naikuwento niya na rin.

Habang unti-unting binubuko ng tadhana ang lihim ni Xander ay pakaunti rin ng pakaunti ang kanyang oras para isakatuparan ang kanyang misyon. Mas lalo pa siyang mahihirapan dahil sa panggigipit ni Roco. Matapos ibunyag kay Leo na may dalawang Xander Oh, ngayon naman ay hihimukin niya si Xander na patayin na si Yonna gamit ang ibibigay niyang gamot.

 Paano nga ba tatapusin ni Xander ang kanyang misyon? Siya ba ay bigla na lang maglalaho o ipagpapatuloy niya ang orihinal na plano? Paano maapektuhan ang kanyang desisyon ng lumalalim niyang pagkakakilanlan kay Yonna? Huwag palalampasin ang That Winter, the Wind Blows, weeknights pagkatapos ng Huwag Ka Lang Mawawala sa ABS-CBN.