Done deal na Ogie wala nang urungan ang paglipat, Regine sasama na sa TV5!

Done deal na raw ang paglipat ni Ogie Alcasid sa TV5 sa susunod na buwan. Ang ibig sabihin, talagang iiwanan na niya ang Kapuso Network na na­ging tahanan niya sa matagal na panahon.

Ewan ko lang kung totoo ang balita na kasama ni Ogie sa paglipat sa TV5 ang kanyang misis na si Regine Velasquez.

Malakas ang tsismis na aalis na rin si Regine sa GMA 7 pero hindi masyadong lumaki ang balita da­hil natabunan ito ng away ng mag-inang Inday at Gretchen Barretto.

Lumilitaw din ang balita na lilipat din si Ma­rian Rivera sa TV5 dahil nagbabu na siya sa kanyang manager na si Popoy Caritativo.

Hindi ako naniniwala na aalis si Marian sa GMA7. Siya ang reyna sa Kapuso network, bakit pa niya isusugal ang kanyang korona sa ibang TV net­work?

Malapit na rin ang expiration ng exclusive contract ni Richard Gutierrez sa GMA 7. Busy pa si Annabelle Rama sa pangangampanya sa Cebu kaya hindi pa alam ng press ang career plans niya para kay Richard.

May balita na aalis si JC de Vera sa poder ni Annabelle pero no comment pa rin ito dahil ang pangangampanya sa Cebu ang kanyang priority.

Si JC ang nagbigay ng hint sa press tungkol sa changes sa kanyang career sa June. Kung hindi nagsalita si JC, hindi magkakaroon ng isyu na lilipat siya sa ibang network at magpapalit siya ng manager.

Mapapanood si JC sa Cassandra: Warrior Angel at ito ang huling project niya sa kanyang 3-year non-exclusive contract sa TV5.

Ganyan kabilis ang panahon. Parang kailan lang nang maging malaking kontrobersiya ang pag-alis ni JC sa GMA 7 at pag-oober da bakod niya sa TV5.

Raymond nabawasan ang trabaho

Nabawasan ang TV show ni Raymond Gutierrez dahil  natapos ang second season ng H.O.T. TV noong nakaraang Linggo.

Nawalan man siya ng regular show, nag­karoon si Raymond ng panahon para mag-concentrate sa kampanya ng kanyang nanay na si Annabelle Rama. Puwede nang mag-stay sa Cebu nang matagal si Raymond  dahil hindi ito  puwersado na bumalik agad sa Maynila para sa kanyang showbiz commitments.

Sen. Koko, planong mamigay ng buko

Napanood ko na kahapon sa TV ang Buko campaign ad ni Senator Koko Pimentel. Ang buko ang ginamit ni Senator Koko sa pagpapaliwanag kung paano niya ibubuko ang mga mandaraya sa senado.
May nagkuwento sa akin na mamimigay si Senator Koko ng mga buko sa pa-presscon sa kanya ni Mother Lily.