Jaclyn ayaw nang patulan si Jake

Natuto na si Jaclyn Jose sa nangyari sa love life ng kanyang anak na si Andi Eigenmann. Tumatanggi na si Jaclyn na magsalita tungkol sa love life ni Andi at sa ex-boyfriend nito na si Jake Ejercito para hindi na mabuhay ang isyu.

Basta ang sabi ni Jaclyn, totoo ang lahat ng mga statement niya noon na medyo sarcastic at hindi nagustuhan ni Jake at ng pamilya nito.

Ayaw nang pahabain pa ni Jaclyn ang kontrobersiya dahil mas mahalaga ngayon sa kanya ang apo na si Ellie, ang anak ni Andi na nagpapasaya sa buhay nila.

Liezl natulungan ng stem cell therapy

Komportable na si Liezl Martinez na pag-usa­pan ang pagkakaroon niya ng breast cancer dahil magaling na siya.

Nabanggit ni Liezl sa interview sa kanya ng Startalk na sinubukan niya ang stem cell therapy at sa pagkakaintindi ko, may kinalaman ang naturang procedure sa paggaling ng kanyang karamdaman.

Mahal ang stem cell therapy kaya nagpapasalamat si Liezl sa kanyang mister na si Albert Martinez dahil masipag ito na magtrabaho. Ang ganda-ganda ngayon ng aura ni Liezl. Kitang-kita sa mukha niya ang sobrang ka­­ligayahan dahil nakalampas siya sa mga pagsubok na pinagdaanan.

Angelu at Bobby nagbabayad sa GMA 7

Excited ang mga young star ng Teen Gen dahil ma­­papanood na nila sa TV ang mga sarili. Ngayon mag­sisimula ang Teen Gen, ang pinakabagong youth-oriented show ng GMA 7 na mapapanood pagkatapos ng Party Pilipinas.

Mga bida sa Teen Gen sina Jeric Gonzales, Thea Tolentino, Gab de Leon, Gianna Revilla, at marami pang iba.

Mapapanood din sa Teen Gen sina Angelu de Leon at Bobby Andrews, ang original stars ng T.G.I.S. Pumayag sina A ngelu at Bobby na suportahan ang mga bagong artista ng Teen Gen dahil payback time ito para sa kanila. Maganda rin ang roles nila sa show na mula sa direksiyon ni Mark Reyes, ang original director ng T.G.I.S.

Sosy Problems hindi pa rin tapos

Ang Sosy Problems ang official entry ng GMA Films sa 38th Metro Manila Film Festival.

Sina Aljur Abrenica, Rhian Ra­mos, Bianca King, Solenn Heussaff, at Heart Evangelista ang mga bida sa Sosy Problems.

Nagsimula nang mag-promote si Aljur ng Sosy Problems na hindi pa nagkakaroon ng presscon dahil tinatapos pa ng cast ang shooting pero nagkaroon na sila kahapon ng show sa isang mall sa Makati City. Walang dapat ipag-alala ang mga nag-aabang sa Sosy Problems dahil siguradong mapapanood ito sa mga sinehan sa Dec. 25.