ISANG ama mula sa London ang nagtagumpay sa isang hindi pangkaraniwang hamon matapos niyang bisitahin ang 42 museo sa loob ng 24 oras, at nagbigay sa kanya ng bagong Guinness World Record para sa pinakamaraming museong napuntahan sa isang araw.
Si Ben Melham, 42, ay inspirasyon ng kanyang mga anak na sina Matilde at Henrik upang subukan ang rekord na ito. Ayon sa kanya, nagsimula lang ang ideya bilang isang masayang usapan habang binabasa nila ang Guinness World Records book.
Kasama ang kanyang mga anak sa ilan sa kanyang pagbisita sa mga museo. Napili niyang gawin ito sa London dahil sa dami ng museo sa lungsod—mahigit 200—mula sa malalaking institusyon tulad ng British Museum at Victoria & Albert Museum, hanggang sa mas maliliit tulad ng Bank of England Museum at Bow Street Police Museum.
Sa kanyang matinding pagsisikap, nalampasan ni Melham ang dating rekord na 33 museo na itinakda nina Sujoy Kumar Mitra at Swaroop Dawrani sa Delhi, India, noong 2024.