Pinakamaliit na arcade game machine, nilikha ng isang estudyante sa Canada!

ISANG estudyante sa Ontario, Canada ang posibleng makapagtala ng Guinness World Record matapos lumikha nang pinakamaliit na arcade machine sa buong mundo.

Ipinakita ng Fanshaw College electromechanical engineering student na si Victoria Korhonen ang kanyang likhang arcade machine na may sukat lamang na 2.5 inches ang taas, 1 inches ang lapad, at 1.3 inches ang haba.

Ang maliit na makina ay gumagana na parang isang regular sized arcade machine kung saan makakapaglaro rito ng classic arcade game na Pong.

Sinukat ng isa sa civil engineering professor ng Fanshawe College ang likhang arcade machine ni Victoria bilang bahagi ng opisyal na pagsusuri para sa Guinness World Record.

Kung mapapatunayan ang sukat nito, matatalo nito ang kasalukuyang record na hawak ng isang arcade machine na may taas na 2.61 inches.