SA simula pa lang, alam ng mga may-ari ng e-bikes, e-trikes, tricycles, pedicabs, pushcarts, kuliglig at iba pang katulad na sasakyan na bawal sila sa kalsada. Kaya nakapagtataka kung bakit kailangan pang ipagpaliban ang paghuli sa mga sasakyang ito? Bakit binigyan pa ng palugit, e noon pa, alam na ng mga may-ari ng mga sasakyang ito na talagang bawal silang yumaot.
Ipinagbawal ng Metropolitan Manila Development Authority (MMDA) ang e-bikes noong Abril 15. Marami agad ang nahuli sa unang araw. Pinagbayad ng P2,500 ang mga drayber ng e-trikes at inimpound ang mga sasakyan. Pero makalipas ang tatlong araw, ipinag-utos ni Pres. Ferdinand Marcos Jr. sa lokal na pamahalaan na bigyan ng palugit ang paghuli sa e-bikes at iba pang e-vehicles. Ayon sa Presidente, kailangang mabigyan ng information campaign ang mga may-ari ng e-bikes. Kailangang malaman ng mga ito na ipinagbabawal ang mga nabanggit na uri ng transportasyon sa main roads. Gayunman, nilinaw ng Presidente na mananatiling bawal ang pagdaan ng e-bikes sa mga pangunahing lansangan alinsunod sa regulasyon ng MMDA. Makaraan ang kautusan ng Presidente, sinabi ng MMDA na ibabalik nila ang nakolektang multa sa mga drayber ng e-bike.
Sa pagpapaliban sa pagbabawal sa e-bike, madaragdagan na naman ang mga aksidente sa kalsada. Sa isang buwan na palugit, tiyak may buhay na namang masasayang. Kamakailan, isang matandang babae sa Marikina ang namatay makaraang mabundol ng e-bike. Tumilapon ang matanda at nabagok ang ulo. Sa latest report, nakapagtala na ng 900 insidente ng e-bike sa Metro Manila. May mga estudyante na hinahayaang magmaneho ng e-bike. Karamihan sa mga ito ay walang nalalaman sa batas trapiko. Maraming e-bikes at e-trikes na pinanghahakot ng paninda ang biglang tumatawid sa mga pangunahing kalsada gaya ng Roxas Boulevard. Lubhang delikado ang ginagawang ito.
Hindi na sana ini-extend ng Presidente ang pagbabawal sa e-bikes. Kung minsan ang pagbibigay ng palugit ang nagiging daan para umabuso ang mga tao.
Wala itong ipinagkaiba sa palugit na laging binibigay sa mga grupo ng jeepney drivers kaya umaabuso sila. Maaaring umabuso rin ang mga may-ari ng e-bikes at hindi na aalis sa kalsada. Magkaroon ng “aserong bakal” sa mga pasaway.