May karapatan bang makabalik sa trabaho ang isang nag-resign?

Dear Attorney,

Puwede pa po ba mag-withdraw ng resignation? —Nesthor

Dear Nesthor,

Ayon sa Korte Suprema sa kaso ng Intertrod Maritime, Inc. vs. NLRC (G.R. No. 81087, 19 June 1991) ang resignation sa trabaho, matapos itong ipaalam ng empleyado, at matapos itong tanggapin, ay hindi na mababawi ng walang pahintulot ng employer.

Dagdag pa ng Korte Suprema,  hindi maaring kasuhan ng illegal dismissal ang isang employer na ayaw ng tanggapin ang  empleyado niyang nag-resign na ngunit nag-iba ng isip at gustong bumalik.

Dahil nagbitiw na sa trabaho ang empleyado, nasa employer na ang pagpapasya kung tatanggapin pa niya ulit ito bilang karapatan niya ang pumili ng mga taong gugustuhin niyang magserbisyo sa kanya bilang empleyado.

Sa madaling sabi, wala ng karapatan ang empleyado sa posisyong kanyang iniwanan. Kung magbago man ang kanyang isip kinalaunan ay  kailangan na niya ang pahintulot ng kanyang employer upang mabawi niya ang kanyang resignation.

Wala nang pinagkaiba ito sa muling pag-a-apply sa trabaho dahil tanging nasa kamay ng employer ang desisyon kung gugustuhin ba niyang makabalik sa dati nitong posisyon ang isang empleyadong nag-resign na.