ISANG 70-anyos na lalaki sa Wisconsin, USA ang nahigitan ang sarili niyang world record sa pagkain ng Big Mac hamburger.
Kinumpirma kamakailan ng records keeping organization na Guinness World Records na si Donald Gorske ang nanatiling world record holder ng titulong “Most Big Macs Eaten in a Lifetime”.
Ito ay matapos niyang mahigitan ang sariling record at umabot na sa 34,128 burgers ang nakain niya simula pa noong dekada 70s.
Ayon kay Gorske, unang beses siyang nakatikim ng Big Mac noong May 17, 1972. Dahil nagustuhan niya ito, itinatago niya ang bawat resibo nito pati na rin ang kahon nito!
Noong 1999, una niyang natanggap ang world record title at simula noon ay hindi na nabawi sa kanya ang titulong ito.
Ayon kay Gorske, binawasan na niya sa dalawang Big Mac sa isang araw ang kanyang kinakain. Ito ay kaunti kumpara noong kabataan niya na kaya niyang kumain ng siyam na Big Mac sa isang araw.
Dahil sa kanyang eating habits maraming nag-aakala na hindi siya healthy. Ngunit ayon kay Gorske, healthy siya at walang nararanasan na kahit anong sakit.