Group Chat, katapat ng rice smuggling

NAGPASARING si DOJ Sec. Boying Remulla kay BOC Commissioner Bien Rubio na alertuhin nito ang mga tauhan sa Subic Port dahil pinamumugaran ng smugglers.

Alam kaya ito ni District Collector Ciriaco Ugay? Tara, alamin natin, he-he-he!

Magmula nang maging Commissioner si Rubio noong Peb. 13, 2023, nakapag-report ito na nakasakote ang BOC nang tinatayang P6.13 bilyong halaga ng shabu.

Pinagsanib na enforcement group ng PDEA, NBI at BOC ang rumesbak sa nakalabas na kargamento bago natimbog. Aba, sawsaw lang pala ang BOC d’yan!

Nagpasiklab din ang BOC nang paghuli sa diumano’y P600 million worth of smuggled rice sa iba’t ibang bodega sa Tondo at Bulacan. Nakalabas na rin ‘yun! Witness pa nga si House Speaker Martin Romualdez. Nakupo!

Si PBBM ang Secretary of Agriculture at si Agrarian Reform Sec. Conrado Estrella III ay dating 18th Congress Deputy Speaker mula sa Abono Partylist representing marginalized agricultural sector.

Ingat kayong mga taga-BOC na tumatara sa rice smugglers. Sabi nga ni Kiko, Group Chat lang ang katapat ng rice smugglers.