Puwede bang makulong dahil sa utang sa credit card?

Dear Attorney,

Puwede ba akong makulong sa utang kong higit 400,000 sa credit card? Nakatanggap na kasi ako ng final demand letter­ mula sa isang law firm kung saan nakalagay na puwede raw akong makulong. —Mike

Dear Mike,

Wala naman talagang naku­kulong dito sa Pilipinas dahil sa utang alinsunod sa Section 20, Article III ng ating 1987 Cons­titution kung saan nakasaad na “no person shall be imprisoned for non-payment of debt”.

Gayunpaman, ang nasabing garantiya ng ating Saligang Batas ay para lamang sa mismong akto ng hindi pagbabayad ng utang. Hindi na saklaw ng proteksiyon na ito ang iba pang aksyon na may kinalaman sa naging pag-utang o sa hindi pagbabayad nito.

Hindi mo nabanggit kung ano ang laman ng demand letter mo pero malamang ay nabanggit doon ang Republic Act No. 8484 na pinarurusahan ang sinumang may credit card na lumipat ng tirahan o trabaho nang hindi nagpapaalam sa credit card company, kung mayroon siyang pagkakautang na higit sa P10,000 at hindi bababa sa 90 araw nang overdue o hindi pa nababayaran. 

Kaya kahit wala namang makukulong dahil lamang sa utang, maari pa ring maharap sa multa at sa pagkakakulong na hindi bababa ng anim na taon at hindi hihigit ng 10 taon ang isang credit card holder kung siya ay ma-convict sa ilalim ng nabanggit na batas.